TOROT
LCS
Greek
о писменехь чръноризца Xрабъра | Прѣжде ѹбѡ словѣне не имѣхѫ книгъ. нѫ чрътами и рѣзами чьтѣхѫ и гатаахѫ погани сѫще. | кръстивше же сѧ, римꙿсками и гръчьскꙑми писменꙑ, нѫждаахѫ сѧ словѣнꙿскꙑ рѣчь безь ѹстроениа. | нѫ како можеть сѧ писати добрѣ гръчьскꙑми писменꙑ. б҃ъ. или живѡтъ. или ѕѣлѡ. или цр҃ковь. или чаание. или ширѡта. или ꙗдь. или ѫдѹ. или юность. или ѫзꙑкъ. и инаа подбнаа симь. | и тако бѣшѫ многа лѣта. | потом же чл҃колюбецъ б҃ъ строѫи всѣ. и не ѡставлѣѫ чл҃ча рода безь разѹма. нѫ вꙿсѧ къ разѹмѹ приводѧ и сп҃сению. помиловавь родъ чл҃чь. посла имь ст҃го кѡнстантина философа нарицаемаго кирила. мѫжа праведна и истинна. | и сътвори имъ, л҃. писмена и осмь. | ѡва ꙋбѡ по чинѹ гръчьскꙑхь писменъ. ѡва же по словѣнстѣи рѣчи. | ѿ пръваго же наченъ по гръчьскѹ. | ѡни ѹбо алфа. а съ, азъ. | ѿ аза начѧть ѡбое. | и ꙗкоже ѡни подобльше сѧ жидовьскꙑмь писменемь сътворишѫ, тако и съ гръчьскꙑмъ. | жидове бѡ пръвое писмѧ имѧть алефь. еже сѧ сказаеть ѹчинение съвръшаѫще. | въводимѹ дѣтищѹ и гл҃ѧще | ꙋчи сѧ. | еже есть алефь. | и гръци подобѧще сѧ томѹ алфа рѣшѫ. | и сподоби сѧ речение сказаниа жидовьска гръчьскꙋ ѫзꙑкѹ. | да речеть дѣтищѹ вь ѹчениа мѣсто | ищи | алфа. бо иши сѧ речеть гръчьскомь ѫзꙑкомъ. | тѣм бо подбѧ сѧ ст҃ꙑи кирилъ створи пръвое писмѧ, азь. | нѫ ꙗко и пръвомѹ сѫщѹ писмени азь. и ѿ б҃а данѹ родѹ словѣнꙿскомѹ на ѿвръстие ѹстъ. въ разѹмъ ѹчѧщим сѧ бꙋквамъ великомь раздвижениемь ѹстъ възгласит сѧ | а ѡна писмена маломъ раздвижениемь ѹстъ възгласѧт сѧ и исповѣдаѫт сѧ. | се же сѫть писмена словѣньскаа. | сице а подбаеть писати и гл҃ати. | а҃ б҃ в҃ г҃. | дрѹѕии же гл҃ѧть | по что есть, л҃и писменъ створилъ. | а можеть сѧ и менꙿшимь того писати. ꙗкоже и гръци к҃д пишѫть.